اشتريت أرضاً من وريث بعقد ابتدائي وبعد 25 عاماً ظهر باقي الورثة، فهل يضيع حقي؟

                
عندي قطعة أرض مساحتها حوالي ٥٠٠ متر اشتريتها في سنة ١٩٩٥ من واحد من الورثة. الأرض دي كانت ملك والده اللي توفى وسابه هو و٣ إخوات تانيين (أخ وأختين).

وقتها كتبنا عقد بيع ابتدائي، ومضى عليه البائع ده ومعاه شاهدين من جيراني اللي لسه عايشين ومستعدين يشهدوا. دفعت تمن الأرض بالكامل وقتها واستلمتها في نفس اليوم، وبنيت عليها سور وبوابة، ومن يومها وهي في حيازتي ومحدش قرب لها، بالعكس كنت بزورها كل فترة وأراعيها.

من حوالي شهرين، فوجئت بإنذار على يد محضر من باقي الورثة (أخوه وأختينه)، بيطالبوني فيه بإخلاء الأرض وتسليمها وبيقولوا إن عقد البيع اللي معايا باطل. حجتهم إن أخوهم اللي باعلي مكنش له حق يبيع حصته لوحده لإن الأرض كانت لسه شايعة في الميراث، وإن بيعه يعتبر بيع لملك الغير، وكان لازم موافقتهم كلهم.

المشكلة الأكبر إن الأرض دي نفسها مش متسجلة شهر عقاري باسم الأب المتوفي أساساً، هي بس عليها رقم تكليف في الضرايب العقارية باسمه، وإعلام الوراثة بتاعهم طبعاً موجود. البائع اللي اشتريت منه توفى هو كمان من ٥ سنين.

أنا معايا أصل عقد البيع الابتدائي، ومعايا إيصالات كهربا وميه قديمة كانت بتيجي على عنوان الأرض دي باسمي من بعد ما حطيت السور والبوابة ووصلت المرافق.

دلوقتي أنا موقفي إيه قانوناً؟
هل العقد الابتدائي اللي معايا ده قوي كفاية في المحكمة؟ وهل حيازتي للأرض لمدة أكتر من ٢٥ سنة بشكل هادئ ومستقر دي ممكن تحميني أو تديني حق؟ يعني أقدر أرفع دعوى تثبيت ملكية بالتقادم الطويل المكسب للملكية؟ وإيه الإجراءات اللي المفروض أعملها فوراً عشان أرد على الإنذار بتاعهم وأحمي حقي في الأرض