جوزي بعتلي إنذار بالطاعة وعاوز يرجعني البيت إيه موقفي القانوني؟

                
أنا متجوزة من تلات سنين، وبشتغل في وظيفة كويسة في شركة خاصة. في أول جوازنا، كانت الأمور كويسة ومستقرة، وكان جوزي متفهم طبيعة شغلي ومواعيدي.
من حوالي سنة، بدأ يتغير تمامًا. بدأ يتدخل في كل تفاصيل حياتي وشغلي، ويطلب مني أسيب الشغل بحجة إننا مش محتاجين فلوس وإن مكان الست بيتها. الموضوع بدأ باقتراحات وبعدين اتحول لطلبات مباشرة وبعدين بقى خناقات كل يوم.

غير موضوع الشغل، بقى شخص صعب في التعامل جدًا. أي نقاش بسيط بينا بيتحول لزعاب وصوت عالي وإهانات. 
مبقاش فيه أي مساحة للكلام أو التفاهم. لو اعترضت على أي حاجة، يتهمني بالتقصير وإني ست متسلطة عشان بشتغل ومستقلة ماديًا. الحياة بقت ضغط نفسي مستمر ومفيهاش أي مودة أو رحمة.

من حوالي شهر، وبعد خناقة كبيرة أهانني فيها قدام أهله، أنا مقدرتش أستحمل أكتر من كده وخدت هدومي وروحت على بيت أهلي.
أنا مكنتش ناوية أطلب الطلاق فورًا، كنت فاكرة إن بعدي عنه فترة ممكن يخليه يفوق ويدرك حجم المشاكل اللي بينا ونلاقي حل أو وسطاء يتدخلوا.

لكن بدل ما يحاول يتكلم أو يحل، فوجئت من يومين بمحضر جايلي لحد بيت أهلي. لما فتحته، لقيته إنذار بالطاعة موجه ليا منه.
الإنذار مكتوب فيه إنه بيدعوني للعودة لمسكن الزوجية اللي هو جهزه، وإنه مسكن شرعي ومستوفي كل حاجة، وإنه بيقوم بالإنفاق عليا.


لما سألت وبحثت، فهمت خطورة الإنذار ده من الناحية القانونية. فهمت إن قدامي مدة ٣٠ يوم بس عشان أعمل حاجة اسمها دعوى اعتراض على إنذار الطاعة،
وإني لو معملتش كده في خلال المدة دي، من حقه يرفع عليا دعوى نشوز، وساعتها كل حقوقي المالية كزوجة بتسقط.

أنا دلوقتي في موقف صعب جدًا. هو بيستخدم القانون عشان يجبرني أرجع لنفس الحياة اللي أنا هربت منها، أو عشان يعاقبني ماديًا ويحرمني من حقوقي لأني رفضت أكمل في الوضع ده.
هو موصفش في الإنذار أي سبب لخروجي، وكأني سبت البيت من غير أي مبرر. أنا مش برفض طاعته كزوج، أنا برفض أرجع لبيت مفهوش أمان نفسي أو احترام.

لو لا قدر الله خسرت دعوى الاعتراض وتم اعتباري ناشز، ما هي الحقوق التي تسقط عني بالضبط