أنا متجوزة من خمس سنين وعندي طفلين. مشكلتي معقدة وصعب تتفهم. أنا بحب جوزي، أو يمكن أكون متعلقة بيه،
ومش قادرة أتخيل حياتي أو حياة ولادي من غيره. لكن في نفس الوقت، أنا بتعذب معاه وبموت في اليوم مية مرة.
لما اتجوزنا، كنت عارفة إن ليه علاقات كتير قبل الجواز، بس قلت كل الناس ليها ماضي وإنه هيتغير وهيبدأ معايا صفحة جديدة. من أول يوم جواز وأنا حاسة إنه مش معايا.
حاسة إنه عمره ما حبني بجد. كلامه قليل، مش بيشاركني أي حاجة عن شغله أو عن حياته، عايشين في بيت واحد زي الأغراب. هو غامض جدًا، تليفونه دايمًا بباسورد ومبيسيبهوش من إيده لحظة، ولو جالله تليفون بيقوم يتكلم في البلكونة أو في أوضة تانية.
شغله نفسه أنا معرفش عنه تفاصيل. هو بيقول إنه شغال في التجارة الحرة، ومستواه المادي كويس جدًا، لكن مفيش مواعيد شغل ثابتة، ساعات بيسهر بره كتير بحجة مقابلة عملا،
وساعات بيسافر يومين تلاتة فجأة. أنا شاكة إن شغله ده فيه حاجة مش مظبوطة أو حرام، مجرد إحساس قوي جوايا لأني مش شايفة أي مصدر واضح للفلوس دي كلها.
موضوع الستات هو اللي بيموتني. أنا معنديش دليل مادي واحد ضده. عمري ما مسكت عليه رسالة أو صورة. لكن كل تصرفاته بتقول إنه بيخوني. ريحة برفان حريمي في عربيته أكتر من مرة،
ولما أسأله يقولي كانت زميلة في الشغل بوصلها. مكالمات بتجيله بالليل ومتتسجلش في سجل المكالمات. اهتمامه الزايد بنفسه ولبسه فجأة، وبعدها يختفي باليومين بحجة شغل. أنا عايشة في دايرة شك هتجنني، ولما بواجهه وأقوله إني شاكة فيه، بيزعق ويهيني ويقلب الترابيزة عليا ويقولي إني مريضة بالشك وإني بخنق فيه.
العلاقة بينا بقت مجرد علاقة جسدية وقت ما هو يكون عاوز أو مزاجه رايق. بيتعامل معايا كأني مجرد أداة لراحته مش أكتر.
ياخد اللي هو عاوزه، وبعدها يرجع لبروده وإهماله تاني كأن شيئًا لم يكن. مفيش كلمة حلوة، مفيش حضن، مفيش أي إحساس بالأمان أو الحب.
أنا وصلت لمرحلة إني بنهار وبعيط طول الوقت لوحدي. أنا زهقت من العيشة دي وحاسة بكرامتي بتتهان كل يوم. نفسي أطلق وأمشي، بس لما بفكر في ولادي وفي إني لسه بحبه، قلبي بيوجعني وبرجع أضعف تاني.
أنا في سجن ومش عارفة أخرج منه. عاوزة أي حل، أي طريق يخلصني من العذاب ده.
أنا سمعت عن الخلع. إيه الفرق بينه وبين الطلاق للضرر من ناحية الإجراءات والحقوق المالية؟
لو قررت أرفع قضية، هل فيه أي طريقة أقدر بيها أطلب من المحكمة تتبع تليفونه أو حساباته عشان أكشف حقيقة شغله وعلاقاته؟
جوزي بعتلي إنذار بالطاعة وعاوز يرجعني البيت إيه موقفي القانوني؟
أنا متجوزة من تلات سنين، وبشتغل في وظيفة كويسة في شركة خاصة. في أول جوازنا، كانت الأمور كويسة ومستقرة، وكان جوزي متفهم طبيعة شغلي ومواعيدي.
من حوالي سنة، بدأ يتغير تمامًا. بدأ يتدخل في كل تفاصيل حياتي وشغلي، ويطلب مني أسيب الشغل بحجة إننا مش محتاجين فلوس وإن مكان الست بيتها. الموضوع بدأ باقتراحات وبعدين اتحول لطلبات مباشرة وبعدين بقى خناقات كل يوم.
غير موضوع الشغل، بقى شخص صعب في التعامل جدًا. أي نقاش بسيط بينا بيتحول لزعاب وصوت عالي وإهانات.
مبقاش فيه أي مساحة للكلام أو التفاهم. لو اعترضت على أي حاجة، يتهمني بالتقصير وإني ست متسلطة عشان بشتغل ومستقلة ماديًا. الحياة بقت ضغط نفسي مستمر ومفيهاش أي مودة أو رحمة.
من حوالي شهر، وبعد خناقة كبيرة أهانني فيها قدام أهله، أنا مقدرتش أستحمل أكتر من كده وخدت هدومي وروحت على بيت أهلي.
أنا مكنتش ناوية أطلب الطلاق فورًا، كنت فاكرة إن بعدي عنه فترة ممكن يخليه يفوق ويدرك حجم المشاكل اللي بينا ونلاقي حل أو وسطاء يتدخلوا.
لكن بدل ما يحاول يتكلم أو يحل، فوجئت من يومين بمحضر جايلي لحد بيت أهلي. لما فتحته، لقيته إنذار بالطاعة موجه ليا منه.
الإنذار مكتوب فيه إنه بيدعوني للعودة لمسكن الزوجية اللي هو جهزه، وإنه مسكن شرعي ومستوفي كل حاجة، وإنه بيقوم بالإنفاق عليا.
لما سألت وبحثت، فهمت خطورة الإنذار ده من الناحية القانونية. فهمت إن قدامي مدة ٣٠ يوم بس عشان أعمل حاجة اسمها دعوى اعتراض على إنذار الطاعة،
وإني لو معملتش كده في خلال المدة دي، من حقه يرفع عليا دعوى نشوز، وساعتها كل حقوقي المالية كزوجة بتسقط.
أنا دلوقتي في موقف صعب جدًا. هو بيستخدم القانون عشان يجبرني أرجع لنفس الحياة اللي أنا هربت منها، أو عشان يعاقبني ماديًا ويحرمني من حقوقي لأني رفضت أكمل في الوضع ده.
هو موصفش في الإنذار أي سبب لخروجي، وكأني سبت البيت من غير أي مبرر. أنا مش برفض طاعته كزوج، أنا برفض أرجع لبيت مفهوش أمان نفسي أو احترام.
لو لا قدر الله خسرت دعوى الاعتراض وتم اعتباري ناشز، ما هي الحقوق التي تسقط عني بالضبط
أنا متجوزة من ٤ سنين، وعندي طفل. جوزي من أول يوم جواز وهو بتاع ستات، كنت بحس وبشوف تلميحات،
بس كنت بكدب إحساسي وأقول دي أوهام. من حوالي سنة، الموضوع زاد عن حده وبقى صريح جدًا. مسكت على تليفونه محادثات كاملة مع واحدة واتنين وتلاتة، كلام وصور مينفعش يتقالوا أو يتبعتوا بين اتنين متجوزين.
واجهته أول مرة، أنكر وحلف ميت يمين إنها مجرد هزار وإنهم صحابه في الشغل. عديت مرة. بعدها بشهرين،
مسكت عليه نفس الحاجات مع واحدة تانية خالص، المرة دي كان فيه اتفاقات على مقابلات.
لما واجهته تاني، اعترف وقعد يعيط واتأسف وباس على إيدي عشان أسامحه، وقالي دي كانت نزوة ومش هتتكرر. وللأسف، عشان بحبه وعشان ابني، صدقته وسامحته.
من أسبوع فات، كانت القاضية. بالصدفة كان سايب اللابتوب بتاعه مفتوح،
وشفت محادثات فيديو وصور مع واحدة تالته، المرة دي العلاقة كانت كاملة وفيها كل التفاصيل المقززة.
حسيت إن الأرض بتدور بيا، وإن كرامتي اتمسحت بيها الأرض للمرة المليون.
المشكلة إني مش قادرة أسيبه. أنا بحبه، ويمكن أكون ضعيفة، وخايفة على ابني وعلى شكلنا قدام الناس، ومش عاوزة أطلق. بس في نفس الوقت، نار الانتقام والغل اللي جوايا بتقتلني.
عاوزة أبهدله، عاوزة أقهره زي ما قهرني، عاوزة أجره في المحاكم وأخليه يكره اليوم اللي عرفني فيه. مش عاوزة فلوس ولا نفقة، أنا عاوزة حقي الأدبي، عاوزة أربيه وأكسره بالقانون.
سمعت عن حاجة اسمها "قضية زنا". هل ممكن أرفعها عليه بالأدلة دي؟ وإيه عقوبتها بالظبط؟
متجوزة من ٨ سنين ومعايا طفلين، ولد ٦ سنين وبنت ٤ سنين. طول عمرنا بينا مشاكل زي أي بيت، لكن من حوالي شهرين جوزي ساب البيت بعد خناقة كبيرة ومبقاش بيرد على تليفوناته.
من يومين بالظبط، اتفاجئت بالمُحضر بيخبط على الباب وبيسلمني "إعلان ورقة طلاقي غيابي".
اكتشفت إنه طلقني من أسبوع وأنا معرفش أي حاجة.
المصيبة الأكبر إن تاني يوم على طول لقيت أخوه وأمه جايين الشقة وبيقولولي لازم تلمي هدومك وتسيبي الشقة دي فورًا لأنك خلاص مبقتيش على ذمته.
أنا حاليًا قاعدة في شقة الزوجية مع ولادي ومش بفتح الباب لحد، لكن خايفة يكسروا الباب أو يعملوا محضر ضدي. جوزي نفسه قفل تليفونه تمامًا ومش عارفة أوصله، وعرفت من قرايبنا إنه ساب الشغل اللي كان فيه عشان يتهرب من أي نفقة ممكن أطلبها.
المشكلة كمان إنه قبل ما يمشي أخد كل الدهب بتاعي بحجة إنه هيصلحه، وكمان النسخة الأصلية من "قائمة المنقولات الزوجية" معاه ومش معايا منها أي نسخة. أنا معنديش أي مصدر دخل وأهلي على قد حالهم بيساعدوني بالعافية في أكل وشرب الولاد اليومين دول.
أنا تايهة ومش عارفة أبدأ منين. بسمع كلام كتير عن حضانة وتمكين ونفقة متعة وقايمة... أنا مش فاهمة حاجة وعايزة أعرف حقوقي بالظبط عشان متضيعش.
بالنسبة لمصاريف ولادي، إيه كل أنواع النفقات اللي من حقي أرفع بيها قضايا؟ (نفقة صغار، مصاريف مدارس، علاج، وغيره).
أهم إجراء لازم أعمله فورًا عشان أمنعهم يطردوني من الشقة
بالنسبة لحقوقي أنا الشخصية بعد الطلاق، إيه هي (نفقة العدة ونفقة المتعة) وإزاي أطالب بيهم
جوزي رافض يسلمني "القايمة" وبيساومني على حقوقي أعمل إيه
محتاجة استشارة ضرورية من محامين فاهمين، لأني في حيرة ومش عارفة أتصرف إزاي.
أنا متجوزة من سنتين، وبسبب خلافات ومشاكل كبيرة وصلت لطريق مسدود معاه، اضطريت أسيب بيت الزوجية وأرجع أعيش في بيت أهلي. طبعاً كل جهازي وحاجتي اللي أبويا وإخواتي شقيوا فيها عشان يجيبوهالي سايباها في الشقة، من أول الأجهزة الكهربائية الكبيرة لحد أصغر حاجة في المطبخ. معايا قائمة منقولات زوجية هو ماضي عليها بكل المنقولات دي على إنها في حيازته على سبيل الأمانة.
المحامي بتاعي بعتله إنذار رسمي على يد محضر من أسبوعين عشان يجي يسلمني حاجتي بشكل ودي، والمهلة القانونية اللي في الإنذار قربت تخلص خلاص.
المشكلة إنه رافض تماماً يسلمني أي حاجة وبيماطل. لما أهلي كلموه، قالهم بصريح العبارة "معظم الحاجات دي أنا اللي دافع فلوسها ومش هتخرج من الشقة"، مع إنه ماضي بإمضته إنه استلم كل الحاجات دي مني أنا على سبيل الأمانة. الأسوأ من كده، إنه بيساومني وبيقول لأبويا "عايزين الحاجة؟ خليها تتنازل عن كل حقوقها الشرعية، المؤخر والنفقة، وأنا أسلمها عفشها".
أنا لا عايزة أتبهدل في المحاكم ولا عايزة حقي يضيع. أنا كل اللي عايزاه جهازي اللي من حق أبويا قبل ما يكون من حقي. :
هل أروح القسم بنفسي أعمل محضر تبديد منقولات زوجية؟ وإيه هي الأوراق المطلوبة اللي لازم تكون معايا؟
هل المحضر ده إجراء قوي وممكن يوصل للحبس فعلاً؟ ولا أغلب القضايا دي بتخلص على غرامة بسيطة أو حكم مع إيقاف التنفيذ ومش بتخوف؟
حجة إنه هو اللي شاري جزء من المنقولات دي، هل ممكن تضعف موقفي في المحكمة أو ياخد بيها براءة رغم توقيعه على القائمة؟
أنا محتاجة حاجتي ضروري عشان أقدر أعيش، هل فيه أي طريقة سريعة ومضمونة أسترد بيها حاجتي غير قضايا التبديد اللي بسمع إنها بتاخد سنين
لو تواصل معايا وعرض يسلمني جزء من الحاجة ويرجع جزء تاني بعدين، هل أقبل وأعمل محضر بالباقي ولا ده يضيع حقي
معروض عليا قضية أحوال شخصية فيها تفاصيل كتير ومحتاجة آخد رأيكم وخبرتكم في أفضل مسار قانوني نمشي فيه، لأني بصراحة شايفة إن كل طريق له مميزاته وعيوبه.
ملخص الوقائع:
الموكلة سيدة متزوجة من حوالي 5 سنوات وعندها طفلين (4 سنين وسنتين). الزوج بيشتغل في دولة خليجية من 3 سنين تقريبًا. في أول سنة من سفره كانت الأمور ماشية بشكل مقبول، لكن في السنتين الأخيرتين الوضع ادهور تمامًا.
الزوج قاطع الاتصال بيها تقريبًا، بيكلم الأولاد مرة كل فين وفين على الواتساب، ومبيبعتش أي مبالغ مالية إلا مبلغ زهيد جدًا لا يكفي مصاريف المدارس أو احتياجات الأولاد الأساسية، والموكلة هي اللي شايلة باقي المصاريف من شغلها ومساعدات أهلها.
الزوج رافض تمامًا إنها تسافر له هي والأولاد، وفي نفس الوقت رافض ينزل إجازة يشوفهم. يعني بالبلدي كده "معلقها"، هي متزوجة على الورق فقط لكن في الحقيقة هي أم عزباء بتصرف على بيتها وعيالها لوحدها.
الموكلة خلاص جابت آخرها نفسيًا وماديًا، ومصممة على الانفصال بشكل نهائي.
النقطة اللي محتارة فيها (الخلع أم الطلاق للضرر):
طريق الخُلع:
أول حاجة فكرت فيها طبعًا هي الخُلع. طريقه مضمون وسريع ومش هنحتاج نثبت ضرر ولا أي حاجة، والموكلة مستعدة تتنازل عن كل حقوقها المالية والشرعية (مؤخر ونفقة عدة ومتعة) في مقابل حريتها.
لكن المشكلة: الزوج شخصية عنيدة جدًا، والموكلة خايفة إنه لما يعرف إنها رفعت خلع، يكايد فيها ويرفع هو قضية "طاعة" أو يبعت لأهله يعملوا محضر "تبديد منقولات زوجية" كإجراء كيدي عشان يضغط عليها.
طريق الطلاق للضرر:
الحل التاني هو رفع دعوى طلاق للضرر بسبب الهجر. وهنا الموكلة هتحتفظ بكامل حقوقها المالية، وده هيفرق معاها جدًا خصوصًا عشان تقدر تصرف على الأولاد. الضرر واضح جدًا وممكن نثبته بشهادة الشهود (الجيران والأهل) اللي هيشهدوا إنه هاجرها ومبيصرفش عليها.
لكن المشكلة: الإجراءات هنا أطول وأعقد، والمشكلة الأكبر اللي هتواجهنا هي الإعلانات. الزوج عنوانه خارج مصر مش ثابت، والإعلان بالطرق الدبلوماسية هياخد وقت طويل جدًا وممكن يوصل لسنة أو أكتر لحد ما الإجراءات تكتمل. إحنا بنتكلم في معاناة طويلة للموكلة.
---
الأسئلة اللي محتاجة رأيكم فيها:
من وجهة نظركم العملية وخبرتكم في المحاكم، إيه المسار الأفضل اللي تنصحوني بيه في قضية زي دي؟ هل أفضّل سرعة الخلع وأعرّض الموكلة لمخاطر البلاغات الكيدية، ولا أتحمل طول إجراءات الطلاق للضرر في سبيل الحفاظ على حقوقها؟
بالنسبة لموضوع الإعلانات في قضية الضرر، هل فيه أي حلول عملية أو "ثغرات" ممكن نستخدمها لتسريع عملية الإعلان للزوج اللي خارج البلاد؟
إزاي أقدر أحصّن الموكلة قانونيًا ضد أي بلاغ كيدي محتمل بتبديد المنقولات لو بدأنا الإجراءات؟ هل فيه إجراء وقائي معين ممكن أعمله من دلوقتي (زي محضر إثبات حالة للمنقولات في شقة الزوجية)؟
لو قررنا نمشي في طريق الطلاق للضرر، إيه أقوى الأدلة اللي ممكن أعتمد عليها في إثبات الهجر والضرر المادي غير شهادة الشهود؟ هل التحويلات البنكية بالمبالغ الزهيدة اللي كان بيبعتها ممكن تفيدني كدليل على تقصيره في النفقة؟
القضية فيها أبعاد إنسانية مستنية أسمع آراء وخبرات حضراتكم :)
متجوزة واحد عايش برا ومشفتش منه غير اسمه في البطاقة اخلعه إزاي
متجوزة من 4 سنين من واحد اسمه "أحمد". جوازنا كان تقليدي جدًا، اتقدملي عن طريق قرايبنا، وكان وقتها لسه راجع من الخليج في أجازة.
قعدنا مع بعض مرتين تلاتة، شاب شكله كويس ومحترم وأهله ناس طيبين، وافقت على طول. كتبنا الكتاب وعملنا فرح، وقعد معايا في مصر شهرين بالظبط،
كانوا شهر عسل وبعدين سافر تاني على شغله في البلد اللي هو فيها.
وقتها اتفقنا إنه هيحاول يخلص ورقي عشان أسافرله، أو على الأقل ينزل كل 6 شهور أجازة. ومن يوم ما سافر والعذاب بدأ.
أول سنة كانت بتعدي بالعافية، بيكلمني كل يومين تلاتة مكالمة سريعة كأنه بيأدي واجب، الفلوس كان بيبعت لأهله وهما يدوني مصروفي بالقطارة كأني لسه باخد مصروف من أبويا. كلامه كله بقى "مش فاضي"،
"ورايا شغل"، "مضغوط". حاولت أفتح معاه موضوع السفر بتاعي، وكل مرة حجة شكل: "الأوضاع هنا صعبة"، "الشركة مش بتدي لم شمل دلوقتي"، "اصبري شوية الدنيا تتظبط".
عدت أول سنة، ونزل أجازة أسبوعين، كانوا كلهم خناق ومشاكل وحسيت إني قاعدة مع واحد غريب مش جوزي.
سافر تاني والوضع بقى أسوأ. مكالماته بقت مرة في الأسبوع، وممكن لأ. لو أنا متصلتش هو مبيسألش. المصروف بيتبعت كل فين وفين،
ولو طلبت حاجة زيادة عشان جهاز باظ أو محتاجة أروح لدكتور، أسمع محاضرة عن "الظروف الصعبة" و"لازم تستحملي".
أنا عايشة لوحدي في شقتنا، أهلي بيساعدوني أكتر ما هو بيساعد. لا هو زوج بيسأل عليا ولا أب لأولادي اللي لسه مجوش أصلاً. أنا من الآخر "متجوزة" في البطاقة بس، لكن في الحقيقة أنا عايشة حياة واحدة "سينجل" بس شايلة لقب "مدام". بتعب لوحدي، بفرح لوحدي، بصرف على نفسي من تحويشة أهلي، وهو ولا هنا.
لما كلمته آخر مرة من شهرين وزعقت وقولتله أنا عايزة حل، يا تنزل وتستقر يا تطلقني، رد بكل برود: "أنا مش هنزل دلوقتي ومش هطلق، واللي عندك اعمليه". وقفل السكة.
أنا خلاص جبت آخري، شبابي بيضيع وأنا محبوسة في سجن
لا أنا متجوزة زي كل الستات ولا أنا مطلقة وأشوف حياتي. صحابي نصحوني بالخلع، بس أنا مرعوبة ومش فاهمة حاجة.
بيقولوا لازم أتنازل عن كل حقوقي. يعني إيه حقوقي دي بالظبط؟ أنا ليا عنده قايمة منقولات ومؤخر صداق، هل كل ده هيروح عليا
أنا معنديش أي إثبات إنه مش بيصرف عليا أو مهمل فيا غير كلامي وكلام أهلي لازم ورق معين عشان أثبت الضرر اللي انا فيه
بعد ما أخلعه، هل يقدر يضايقني أو يرفع عليا قضايا تانية بعدين
متأسفه على الاطاله
.png)