معروض عليا قضية أحوال شخصية فيها تفاصيل كتير ومحتاجة آخد رأيكم وخبرتكم في أفضل مسار قانوني نمشي فيه، لأني بصراحة شايفة إن كل طريق له مميزاته وعيوبه.
ملخص الوقائع:
الموكلة سيدة متزوجة من حوالي 5 سنوات وعندها طفلين (4 سنين وسنتين). الزوج بيشتغل في دولة خليجية من 3 سنين تقريبًا. في أول سنة من سفره كانت الأمور ماشية بشكل مقبول، لكن في السنتين الأخيرتين الوضع ادهور تمامًا.
الزوج قاطع الاتصال بيها تقريبًا، بيكلم الأولاد مرة كل فين وفين على الواتساب، ومبيبعتش أي مبالغ مالية إلا مبلغ زهيد جدًا لا يكفي مصاريف المدارس أو احتياجات الأولاد الأساسية، والموكلة هي اللي شايلة باقي المصاريف من شغلها ومساعدات أهلها.
الزوج رافض تمامًا إنها تسافر له هي والأولاد، وفي نفس الوقت رافض ينزل إجازة يشوفهم. يعني بالبلدي كده "معلقها"، هي متزوجة على الورق فقط لكن في الحقيقة هي أم عزباء بتصرف على بيتها وعيالها لوحدها.
الموكلة خلاص جابت آخرها نفسيًا وماديًا، ومصممة على الانفصال بشكل نهائي.
النقطة اللي محتارة فيها (الخلع أم الطلاق للضرر):
طريق الخُلع:
أول حاجة فكرت فيها طبعًا هي الخُلع. طريقه مضمون وسريع ومش هنحتاج نثبت ضرر ولا أي حاجة، والموكلة مستعدة تتنازل عن كل حقوقها المالية والشرعية (مؤخر ونفقة عدة ومتعة) في مقابل حريتها.
لكن المشكلة: الزوج شخصية عنيدة جدًا، والموكلة خايفة إنه لما يعرف إنها رفعت خلع، يكايد فيها ويرفع هو قضية "طاعة" أو يبعت لأهله يعملوا محضر "تبديد منقولات زوجية" كإجراء كيدي عشان يضغط عليها.
طريق الطلاق للضرر:
الحل التاني هو رفع دعوى طلاق للضرر بسبب الهجر. وهنا الموكلة هتحتفظ بكامل حقوقها المالية، وده هيفرق معاها جدًا خصوصًا عشان تقدر تصرف على الأولاد. الضرر واضح جدًا وممكن نثبته بشهادة الشهود (الجيران والأهل) اللي هيشهدوا إنه هاجرها ومبيصرفش عليها.
لكن المشكلة: الإجراءات هنا أطول وأعقد، والمشكلة الأكبر اللي هتواجهنا هي الإعلانات. الزوج عنوانه خارج مصر مش ثابت، والإعلان بالطرق الدبلوماسية هياخد وقت طويل جدًا وممكن يوصل لسنة أو أكتر لحد ما الإجراءات تكتمل. إحنا بنتكلم في معاناة طويلة للموكلة.
---
الأسئلة اللي محتاجة رأيكم فيها:
من وجهة نظركم العملية وخبرتكم في المحاكم، إيه المسار الأفضل اللي تنصحوني بيه في قضية زي دي؟ هل أفضّل سرعة الخلع وأعرّض الموكلة لمخاطر البلاغات الكيدية، ولا أتحمل طول إجراءات الطلاق للضرر في سبيل الحفاظ على حقوقها؟
بالنسبة لموضوع الإعلانات في قضية الضرر، هل فيه أي حلول عملية أو "ثغرات" ممكن نستخدمها لتسريع عملية الإعلان للزوج اللي خارج البلاد؟
إزاي أقدر أحصّن الموكلة قانونيًا ضد أي بلاغ كيدي محتمل بتبديد المنقولات لو بدأنا الإجراءات؟ هل فيه إجراء وقائي معين ممكن أعمله من دلوقتي (زي محضر إثبات حالة للمنقولات في شقة الزوجية)؟
لو قررنا نمشي في طريق الطلاق للضرر، إيه أقوى الأدلة اللي ممكن أعتمد عليها في إثبات الهجر والضرر المادي غير شهادة الشهود؟ هل التحويلات البنكية بالمبالغ الزهيدة اللي كان بيبعتها ممكن تفيدني كدليل على تقصيره في النفقة؟
القضية فيها أبعاد إنسانية مستنية أسمع آراء وخبرات حضراتكم :)
.png)