أخويا هيقدم في الجيش وبابا كان عليه قضية سياسية

                أنا بكتب بخصوص أخويا الصغير. هو لسه متخرج السنة دي من كلية الهندسة، هو حاليًا بيجهز ورقه عشان يقدم نفسه لمنطقة التجنيد التابع ليها زي كل الشباب اللي في سنه.
                المشكلة اللي مسببالنا قلق كبير كأسرة هي خلفية والدي السياسية القديمة.

والدي في فترة ما بعد ٢٠١١، كان له نشاط سياسي محدود، وكان وقتها عضو في حزب معتمد ومرخص. في عام ٢٠١٥، تم القبض عليه ضمن مجموعة من أعضاء الحزب 
في قضية تتعلق بالتظاهر بدون ترخيص ونشر أخبار كاذبة. الموضوع كان كبير وقتها، ووالدي قضى فترة في الحبس الاحتياطي على ذمة القضية دي، حوالي ستة أشهر، وبعدها خرج بكفالة وبدأت المحاكمة.

بعد حوالي سنة من المحاكمات والجلسات، المحكمة حكمت ببراءة والدي وكل المتهمين معاه لعدم كفاية الأدلة. من يوم ما والدي أخد البراءة، وهو بعد تمامًا عن أي شكل من أشكال السياسة، 
ورجع لحياته الطبيعية وشغله العادي ومبقاش له أي نشاط على الإطلاق. إحنا أسرة عادية جدًا وملناش في أي حاجة، والموضوع ده بالنسبة لنا صفحة قديمة واتقفلت من سنين طويلة.

دلوقتي، القلق كله منصب على أخويا. كلنا عارفين إن التقديم للجيش بيتبعه تحريات أمنية مكثفة عن الشاب وعن أسرته حتى الدرجة الرابعة.
وأكيد في التحريات دي هيظهر موضوع القضية القديمة بتاعة والدي.

أخويا نفسه عنده تخوفين أساسيين. التخوف الأول، إنه يترفض من الجيش وما يتقبلش للخدمة.
هو معندوش مشكلة يخدم بلده زي أي شاب، وبيخاف إن الرفض ده يكون فيه وصمة اجتماعية ليه وسط أصحابه وقرايبه.


لكن التخوف الأكبر والمقلق أكتر، هو إنه ياخد إعفاء نهائي بسبب التحريات دي، أو ما يسمى بـ الإعفاء لأسباب وطنية أو أمنية. 
سمعنا كتير إن النوع ده من الإعفاء بيكون نقطة سودة في مستقبل الشاب. بيتقال إنه بيمنعه من تولي أي وظيفة حكومية أو حساسة في المستقبل، وإن بعض الشركات الكبيرة في القطاع الخاص كمان بتتحفظ على توظيف أي حد معاه النوع ده من الإعفاء. هو خايف إن مستقبله المهني كله يتدمر وإن أبواب كتير تتقفل في وشه
بسبب حاجة معملهاش وملوش أي ذنب فيها، مجرد إن والده كان له رأي سياسي في فترة معينة من حياته وانتهت ببرائته.

إحنا محتارين ومش عارفين إيه اللي ممكن يحصل، وهل فيه أي حاجة ممكن نعملها عشان نتجنب التأثير السلبي ده.

هل هناك أي إجراءات يمكن اتخاذها، مثل تقديم ما يفيد ببراءة الوالد ضمن أوراق التقديم، أو أي خطوات استباقية أخرى لتحسين موقفه في التحريات