صاحب الشقة رافض يرجعلي التأمين إيه الإجراء القانوني

                في مشكلة مع صاحب الشقة اللي كنت مأجراها.

أنا كنت مأجرة شقة لمدة سنتين، والعقد بتاعي انتهى آخر الشهر اللي فات. لما استلمت الشقة دفعت مبلغ ١٠ آلاف جنيه كتأمين، وده كان قيمة إيجار شهرين. طول فترة إقامتي كنت ملتزمة جدًا ومحافظة على الشقة كأنها بيتي بالظبط، وعمري ما اتأخرت في دفع الإيجار ولا كان فيه أي شكوى مني.

قبل ما أنهي العقد بشهر، بلغت المالك رسميًا عن طريق الواتساب إني هسلم الشقة في الميعاد المحدد، زي ما العقد بينص. وقبل التسليم بيومين، نضفت الشقة كويس جدًا ورجعتها زي ما استلمتها وأحسن كمان، وصلحت كام حاجة بسيطة على حسابي. وعشان أكون في أمان، صورت الشقة كلها فيديو وصور واضحة تبين حالتها الممتازة وإنها سليمة ومفيهاش أي حاجة.

في يوم التسليم، جه المالك واستلم الشقة ومعاه المفاتيح، وبص عليها بنفسه وقالي "تمام". لما سألته عن فلوس التأمين، بدأ يتحجج بحجج غريبة. في الأول قالي "هخصم فواتير الكهربا والمياه"، قلتله مفيش مشكلة مع إني كنت دافعة كل حاجة ومعايا الإيصالات.

بعدها، بدأ يخترع تلفيات مش موجودة. يقولي "الأرض فيها خدوش" مع إنها كانت موجودة من قبل ما أسكن، ويقولي "الحيطان محتاجة وش نضافة" مع إن الشقة كانت بحالتها. الخلاصة إنه بعد كل ده، قالي إن تكلفة "التصليحات" اللي هو بيقول عليها دي هتعدي قيمة التأمين كله، وإنه مش هيرجعلي ولا جنيه!

أنا حاولت أتكلم معاه بالعقل وبعتله الصور والفيديوهات اللي صورتها، لكنه دلوقتي بقى رافض يرد على رسايلي ومكالماتي تمامًا. أنا حاسة بإني اتنصب عليا وإن فلوسي راحت عليا.

أسئلتي لحضراتكم:

قد الإيجار اللي معايا هو العقد الأزرق العادي اللي من المكتبة. هل ده بيحمي حقي في استرداد التأمين بشكل كافي
              الصور والفيديوهات اللي معايا، ورسايل الواتساب اللي بيني وبينه، تعتبر دليل قوي تعترف بيه المحكمة .. و بيدعي وجود تلفيات. مين اللي عليه عبء الإثبات؟ يعني هل أنا اللي لازم أثبت إن مفيش تلفيات، ولا هو اللي لازم يثبت وجودها بفواتير أو بشهود مثلاً؟