نزاع مع شركة تطوير عقاري بسبب مستحقات

                عندي شركة مقاولات صغيرة شغالة بقالها 8 سنين، مسجلة في السجل التجاري وبطاقة ضريبية وكل حاجة قانوني. 
                من حوالي سنة دخلت في مشروع كبير مع شركة تطوير عقاري معروفة، العقد كان فيه بنود واضحة: أنا هسلم أعمال الخرسانة والأساسات خلال 6 شهور،
                
                والدفع هيكون على دفعات مرتبطة بالمراحل، مع شرط جزائي لو في تأخير من ناحيتي أو من ناحيتهم.
المشكلة بدأت لما خلصت أول مرحلتين وسلمت طبقًا للمواصفات، واستلموا رسمي، لكن لما جيت أطالب بالدفعة التالتة (حوالي 2 مليون جنيه)، 
الشركة بدأت تماطل وتقول إن في مراجعة مالية داخلية، وبعدها قالولي إن في تعديلات في التصميمات وإن لازم أعمل شغل إضافي من غير ما يمدوا ملحق عقد ولا يحددوا سعر جديد.
أنا رفضت أشتغل من غير اتفاق مكتوب، لأن ده هيأثر على التكلفة والجدول الزمني.
بعدها فوجئت إنهم بعتولي إنذار على يد محضر بيقول إن أنا متأخر في التسليم، وإنهم هيفعلوا الشرط الجزائي عليا، 

رغم إن التأخير سببه التعديلات اللي طلبوها من غير ما يوثقوها. كمان عندي مستخلصات معتمدة من الاستشاري تثبت إن الشغل اللي عليا في المرحلة التانية خلص في الميعاد، وإن التعديلات جات بعد كده.

عندي عمال وموردين بيطالبوني بحقوقهم.
الشركة الكبيرة دي ليها نفوذ، وخايف يضغطوا عليا عشان أتنازل أو أقبل شروط مجحفة.
العقد الأصلي فيه شرط تحكيم في غرفة التجارة، بس أنا مش عارف أبدأ إزاي ولا أضمن حقي بسرعة.
عندي كل المستندات: العقد الأصلي، المستخلصات المعتمدة، المراسلات على الإيميل، وصور من الموقع قبل وبعد التعديلات.

أبدأ بإيه إنذار رسمي بالمطالبة بالمستحقات ولا أرفع دعوى مباشرة؟ وهل أقدر أطلب وقف الشرط الجزائي مؤقتًا لحد ما النزاع يتحسم
             لو الشركة حاولت تسحب خطاب الضمان البنكي، أقدر أوقف ده إزاي قانونيًا وهل أقدر أطلب أمر وقتي من قاضي الأمور المستعجلة لحين الفصل في النزاع