نصب عليا بطلب دفع على انستا باي ازاي أرجع فلوسي

                عاوزة أحكي لكم على عملية نصب حصلتلي عشان كله ياخد باله، ومحتاجة أعرف أعمل إيه. أنا كنت عارضة لاب توب بتاعي للبيع على OLX.
                جالي واحد على رسائل الموقع، وبعدين خدنا أرقام بعض وكملنا كلام على واتساب. اتفقنا على سعر ١٥ ألف جنيه.

قالي إنه من محافظة تانية، وإنه هيحوللي الفلوس فورًا على "انستا باي" 
وهيبعت شركة شحن تستلم اللاب توب تاني يوم. أنا بستخدم انستا باي على طول وشايفاه آمن، فوافقت.

بعدها بدقيقتين بالظبط، قالي "تمام أنا حولتلك الفلوس، هيجيلك دلوقتي إشعار على انستا باي، دوسي موافقة ودخلي الرقم السري بتاعك عشان تأكدي استلام الفلوس وتدخل حسابك". وفعلاً، لقيت إشعار من تطبيق انستا باي نفسه بالظبط، مكتوب فيه اسمه والمبلغ (١٥ ألف جنيه). أنا كنت مستعجلة وقتها وبجهز العشا، فبسرعة دوست "تأكيد" وكتبت الرقم السري بتاعي عشان أخلص.

بعدها بخمس دقايق، قلقت إن رسالة البنك بوصول الفلوس مجتش. فتحت حسابي البنكي عشان أتأكد، وهنا كانت الصدمة اللي مش مستوعباها... لقيت إن الـ ١٥ ألف جنيه اتخصموا من حسابي أنا! مش زادوا عليه.

رجعت بسرعة لتطبيق انستا باي عشان أفهم، واكتشفت الكارثة. الإشعار اللي جالي مكنش إشعار "وصول مبلغ"، ده كان إشعار "طلب دفع" هو اللي بعتهولي. وأنا لما دوست تأكيد وكتبت الرقم السري، كنت بوافق إني أدفعله هو المبلغ ده، مش بستلمه منه.

طبعًا جريت أكلمه على واتساب، لقيت صورته اختفت وعملي بلوك
 هل الخدعة دي تعتبر جريمة نصب ولا الفلوس راحت عليا والبنك بتاعي أو تطبيق انستا باي ممكن يلغوا العملية دي ويرجعولي فلوسي