اتنصب عليا أونلاين عن طريق وسيط مالي مشهور

                محتاجة أعرف إيه الإجراءات الصح اللي المفروض أعملها. من حوالي أسبوع، كنت عاوزة أشتري كورس تصميم متخصص من على موقع أجنبي. الموقع ده طريقة الدفع الوحيدة عليه كانت عن طريق باي بال.
                أنا معنديش حساب باي بال، ولما حاولت أعمل واحد لقيت الموضوع معقد ومحتاج ربط بفيزا معينة وإجراءات طويلة.

بدأت أدور على حل على فيسبوك، ولقيت إن فيه ناس كتير بتقدم خدمة اسمها الوساطة المالية. يعني أنا أديلهم المبلغ بالمصري على فودافون كاش، 
وهما يدفعوا للموقع بالدولار عن طريق الباي بال بتاعهم وياخدوا عمولة بسيطة. لقيت جروب كبير على فيسبوك كله وسطاء، واخترت واحد منهم كان مشهور جدًا،
صفحته عليها آلاف المتابعين، والأهم من كل ده، كان عليها مئات الصور لآراء عملاء سابقين بيشكروا فيه وفي أمانته وسرعته. 
كان منزل صور كتير جدًا لمحادثات ناس بتشكره وتحويلات ناجحة، وده اللي خلاني أثق فيه تمامًا.

تواصلت معاه على واتساب، وكان شخص محترف جدًا في كلامه. بعتله لينك الكورس، حسبلي المبلغ بالظبط بالجنيه المصري بعد ما ضاف العمولة بتاعته، والمبلغ الإجمالي كان حوالي ٤ آلاف جنيه.
طلب مني أحول المبلغ على رقم فودافون كاش معين، وقالي أول ما الفلوس توصل هيشتري الكورس فورًا ويبعتلي بيانات الدخول.

وبالفعل، حولت المبلغ، وبعتله سكرين شوت من رسالة التحويل عشان أأكد. رد عليا وقالي تمام الفلوس وصلت، ساعة بالكتير وهبعتلك كل حاجة.

بعدها بساعتين، لقيت مفيش أي حاجة اتبعتت. دخلت أكلمه، لقيت الرسالة مب توصلش. استنيت لتاني يوم، حاولت أكلمه تاني، اكتشفت إنه عملي بلوك على واتساب.
دخلت على صفحته على فيسبوك عشان أكتبله، لقيته عملي بلوك من هناك كمان. الراجل فص ملح وداب. صفحته لسه موجودة زي ما هي، لكن أنا مش قادرة أوصله بأي شكل.

بعد ما اتنصب عليا، بدأت أدور أكتر ورا قصته. قدرت أوصل لواحدة من البنات اللي كان منزل رأيها الإيجابي على صفحته. لما كلمتها وسألتها، 
اتصدمت لما قالتلي إنه نصب عليها هي كمان من شهرين بنفس الطريقة بالظبط، وإن رأيها الإيجابي ده كان بخصوص معاملة قديمة حصلت قبل ما يبدأ ينصب على الناس.
اكتشفت إن كل الآراء الإيجابية اللي على صفحته يا إما قديمة جدًا، يا إما مفبركة.

أنا دلوقتي معايا المحادثات الكاملة بيننا على واتساب، ومعايا رقم تليفونه اللي حولت عليه فودافون كاش، واسمه اللي ظاهر على انستا باي المرتبط بنفس الرقم.
إيه هي الجهة الصحيحة اللي المفروض أروح أقدم فيها البلاغ