تعرضت للسب والقذف على الانترنت: حقك بالقانون

                بحب الكورة جدًا وبشجع الزمالك من صغري. بحب أتابع الماتشات وأحللها، وليا وجهة نظر فنية بحب أشارك بيها.
                موقع المختلط، أنا متابعاه من زمان ودايمًا بدخل في قسم التعليقات بعد كل ماتش وأكتب رأيي وتحليلي للمبا 
من يومين، بعد ماتش مهم للزمالك، دخلت كتبت تعليق طويل بحلل فيه أداء اللاعيبة وبعض القرارات الفنية للمدرب.
التعليق كان محترم جدًا، كله كلام في الكورة وبس. أغلب الناس تفاعلت مع كلامي، ناس اتفقت وناس اختلفت باحترام، وده الطبيعي.

لكن فجأة، لقيت واحد دخل رد على كلامي بشكل غريب. في الأول بدأ يغلط فيا ويقولي إنتي إيه اللي فهمك في الكورة، روحي شوفي المطبخ.
أنا تجاهلته ومردتش عليه. لما لقي إني مش برد، الموضوع اتطور بشكل بشع.

بدأ يكتب تعليقات تانية فيها سب وقذف صريح ليا ولأهلي. كلام ميتقالش وميتكتبش، كله خوض في السمعة والشرف واتهامات أخلاقية مقززة.
الموضوع خرج تمامًا عن نطاق الكورة وبقى هجوم شخصي على سمعتي وعلى شرفي لمجرد إني بنت وبقول رأيي في الكورة. أنا حسيت بإهانة ووجع عمر ما حسيت بيهم في حياتي.

طبعًا عملت سكرين شوت لكل التعليقات بتاعته قبل ما يتمسحوا. وبلغت إدارة الموقع، وهما كانوا محترمين جدًا وحذفوا التعليقات بتاعته وعملوله حظر فوري من الموقع.

لكن بالنسبة لي، الحظر ده مش كفاية. أنا مش هقبل إن واحد يستبيح سمعتي وشرف أهلي بالشكل ده ويفتكر إنه هيفلت لمجرد إنه قاعد ورا شاشة وبيستخدم اسم وصورة وهميين.
أنا عاوزة آخد حقي بالقانون، وعاوزة أثبت لنفسي ولكل الناس إن العالم الافتراضي ده مش غابة، وإن فيه قانون بيحكمه، وإن كرامة الناس مش لعبة.

أنا حاليًا معنديش أي معلومات عنه غير اسمه الوهمي على الموقع، وصورة البروفايل بتاعته اللي غالبًا مش صورته، وصور التعليقات المسيئة اللي أنا خدتها سكرين شوت.

هل الشتيمة والسب والقذف على تعليق في موقع عام على الإنترنت دي تعتبر جريمة حقيقية في القانون المصري