متى نرى قانونًا حقيقيًا يحمي بنات مصر في الشوارع

                بجد مش عارفة أقول إيه ولا أبدأ منين، بس اللي بيحصل في شوارعنا ده بقى حاجة لا تطاق. إحنا وصلنا لمرحلة إن البنت وهي ماشية في الشارع، بتعمل حساب لكل خطوة وكل نفس بتاخده، مش عشان هي عاملة حاجة غلط، لأ، عشان خايفة من اللي ممكن تسمعه أو تشوفه.

امبارح كنت راجعة من مشوار عادي جدًا، في عز النهار وفي شارع المفروض إنه عمومي وحيوي. مش هتكلم عن النظرات اللي بتفصِّل الجسم، هتكلم عن الكلام والألفاظ اللي تتقال بكل بجاحة ومن غير أي خوف. كلام ميتقالش، كلام يحسسك إنك مش بنى آدمة، مجرد شيء ماشي في الشارع من حق أي حد إنه يضايقه.

والمشكلة الأكبر بقى، تبص حواليك. فين الأمن؟ فين الرقابة؟ فين الظابط اللي المفروض يكون واقف في الشارع عشان يمنع المهزلة دي؟ مفيش. الشوارع فاضية تمامًا وكأن البلد متروكة، كأن كل واحد من حقه يعمل اللي هو عايزه ومحدش هيقوله أنت بتعمل إيه. هو ده مش تسيب؟ لما شاب يقف ويعاكس بنت بصوت عالي ويبقى ضامن ١٠٠٪ إنه مفيش أي سلطة أو قانون هيحاسبه، يبقى ده اسمه إيه غير تسيب؟!

أنا بتكلم عن نفسي وعن كل بنت أعرفها، مفيش واحدة فينا مسلِمتش من الأذى ده. إحنا مش بنطلب المستحيل، إحنا بنطلب أبسط حقوقنا الإنسانية: نمشي في الشارع بأمان ومن غير ما نتعرض لإهانة.

الموضوع مش هيتحل بحملات توعية وكلام جميل. الموضوع محتاج قوانين صارمة، قوانين حقيقية توقف كل واحد عند حده. محتاجين قانون يخلي اللي يفكر بس إنه يرمي كلمة لبنت في الشارع، يعمل حساب إنه هيدفع تمنها غالي، هيتحبس ويتفضح. لازم الناس دي تخاف، لأن اللي مبيربيهوش أهله، القانون هو اللي بيربيه. عايزين نشوف الظباط في الشوارع تاني، وعايزين نحس إن البلد دي فيها قانون بيحمي بناتها.