استشارة في جريمة اختراق وحسابات مسروقة

                عندي قضية جرائم إلكترونية معقّدة وعايزة رأي قانوني تفصيلي: أنا صاحبة مشروع صغير أونلاين ببيع منتجات عبر صفحة فيسبوك وموقع بسيط 
                والدفع عندي بيكون إمّا تحويل بنكي أو محافظ موبايل أو دفع عند الاستلام. من حوالي أسبوعين جالي SMS شكله رسمي بيقول إن خط الموبايل هيتوقف ولازم أعمل تأكيد للبيانات على لينك، دخلت اللينك وكتبّت رقم الموبايل والكود اللي جالي.
                بعدها بيوم الصبح لقيت واتساب خارج لوحده، 
                وإيميل جوجل باعت إشعارات دخول من جهاز جديد، وبعدها الشبكة اختفت من خطي تمامًا. رحت شركة الاتصالات لقيت إن في شريحة بدل فاقد اتعملت بنفس رقمي من فرع تاني من غير علمي، 
                واستلمت أنا شريحة جديدة واسترجعت الرقم.
في الفترة اللي كانت الشريحة مش معايا فيها، اتسحب من حسابي البنكي أكتر من عملية تحويل لمحافظ إلكترونية مختلفة ومبالغ اتدفعت أونلاين باستخدام OTP 
اللي كان بيتبعت على رقمي. كمان لقيت صفحة فيسبوك بتاعتي اتمسكت، 
وبدأت تبعت لعملائي رسائل فيها لينكات دفع وهمية واستلام مقدمات، 
وبعض العملاء للأسف دفعوا من خلال الروابط دي. كمان الإيميل الرئيسي بتاعي اتسحب واتسحب معاه ملفات فيها صور بطاقتي الضريبية والسجل التجاري ونسخ من بطاقتي الشخصية وفواتير مرافق، 
وبعتولي على تليجرام بيأكدوا إنهم حطّوا إيديهم على الملفات دي وبيطلبوا مبلغ مقابل يرجّعوا الحسابات ويوقفوا التشهير، وكمان نزلوا منشورات على الصفحة فيها كلام يسيء لسمعتي كمشروع واتهامات كاذبة للنصب على العملاء.
أنا عملت محضر في القسم المحلي لإثبات الحالة وخدت رقم المحضر المؤقت، وقالولي أتوجه لمباحث الإنترنت. في نفس الوقت كلّمت البنك وعملت اعتراض على العمليات، والبنك قال هيحقق وطلب مني محضر رسمي وتقارير فنية. شركة الاتصالات فتحت شكوى داخلية على إصدار الشريحة بدل فاقد بدون تحقق كافي، وطلبوا مني أستنى نتيجة التحقيق الداخلي. حالياً: رجّعت الإيميل بعد إجراءات الاسترداد، بس صفحة فيسبوك لسة تحت سيطرتهم، وفي محتوى مسيء ولسة في رسائل بتطلع باسم الصفحة. العملاء المتضررين بيطالبوني أرجع لهم فلوسهم وبيقولوا إنهم دفعوا بناءً على رسائل جاية من صفحتي الرسمية. عندي سكرينشوتس للرسائل وروابط الدفع الوهمية، وكشوف حساب تبين التحويلات، وإشعارات جوجل بدخولات غير معروفة، وخطابات من البنك بتوقيتات العمليات، وإفادة من شركة الاتصالات بتاريخ إصدار الشريحة البدل فاقد.

من ناحية الاختصاص والإجراءات: أبدأ ببلاغ رسمي مباشر في الإدارة العامة لتكنولوجيا المعلومات (مباحث الإنترنت)، ولا أكمّل على المحضر اللي في القسم ويتحال؟ وهل مكان الاختصاص هيبقى محل إقامتي، ولا مكان فرع الاتصالات اللي أصدر الشريحة، ولا مكان البنك، ولا مكان حصول التحويلات؟
 محتاجة توجيه قانوني