فتاة تتعرض لحملة سب وقذف من خطيبها السابق على الفيسبوك

                حياتي بتتدمر حرفيًا بسبب الفيسبوك.. أنا كنت مخطوبة زي أي بنت، خطوبة صالونات عادية، وفي الأول كان كل شيء كويس وباين إنه إنسان محترم. لكن مع الوقت بدأت أكتشف فيه طباع صعبة، بخيل في مشاعره وفي تصرفاته، متحكم جدًا، وشكاك لدرجة تخنق. استحملت كتير عشان كلام الناس وعشان أهلي اللي كانوا شايفينه مناسب، لحد ما وصلت لمرحلة مقدرتش أكمل فيها، وقررت أفسخ الخطوبة.

طبعًا هو متقبلش الموضوع بسهولة، وقعد يهددني ويقولي "هخليكي تندمي على اليوم اللي عرفتيني فيه". أنا في الأول خدت كلامه ده على إنه مجرد كلام من واحد محروق دمه، وعملتله بلوك من كل حتة وقلت الأيام هتنسيه.

يا ريتني ما قلت.

بعدها بحوالي أسبوع، لقيت بنت صاحبتي بتبعتلي سكرين شوت لأكونت على فيسبوك معمول جديد، الأكونت باسمي وصورتي الشخصية، بس مكتوب في الـ Bio كلام كله إيحاءات إني بنت مش كويسة. أنا قلبي وقع في رجليا، دخلت على الأكونت لقيته منزل بوستات فيها كلام قذر عني وعن أهلي، كلام كله كذب وتلفيق، بيقول إني كنت بخونه وإني مرتبطة بواحد تاني عشان فلوسه.

الكارثة مكنتش في البوستات بس، الكارثة إنه بدأ ياخد الصور اللي كنت بنزلها على أكونتي عادي، صور مع صحباتي في خروجة، أو صورة ليا في مناسبة عائلية، وبدأ يركب عليها صور تانية بالفوتوشوب عشان يخليني أبدو في أوضاع مخلة. صور بشعة وواضح إنها متركبة، بس للأسف في ناس بتصدق أي حاجة تشوفها.

الموضوع متوقفش عند كده، ده وصل لحتة مرعبة. بدأ يعمل سكرين شوتات مزورة لمحادثات واتساب، كأنها بيني وبين شباب، بكلام عمري ما أنطق بيه ولا أعرف عنه حاجة، كلام ياخد الخدش.

الأكونت المزيف ده بدأ يبعت طلبات صداقة لكل قرايبي، صحابي، جيراني، وحتى زمايلي في الشغل. وبدأ يبعت للناس دي كلها الصور والمحادثات المفبركة على الماسنجر، وبيكتبلهم "شوفوا فلانة المحترمة على حقيقتها".

تليفوني مبقاش بيبطل رن، قرايبي بيكلموا أبويا وأمي، زمايلي في الشغل بيبصولي بصات غريبة، ومديري طلب يقابلني عشان "يفهم إيه اللي بيحصل". أنا حرفيًا سمعتي بقت في الأرض، ومبقتش عارفة أوري وشي للناس إزاي. بقيت حاسة إني عريانة قدام العالم كله، وكل ده بسبب إنسان مريض قرر ينتقم مني لما رفضته.

طبعًا أنا عارفة ومتاكدة إنه هو اللي ورا الموضوع ده. لميت كل السكرين شوتات دي، للأكونت وللبوستات وللرسائل اللي وصلت لصحباتي، وخدت بعضي وجريت على مباحث الإنترنت. عملت محضر سب وقذف وتشهير وجرائم تقنية معلومات، والضابط قالي إنهم هيعملوا تتبع للـ IP Address اللي اتعمل منه الأكونت.

أنا دلوقتي عايشة في جحيم، مستنية نتيجة المحضر، وفي نفس الوقت بحاول ألملم اللي فاضل من حياتي وسمعتي اللي اتدمرت. كل يوم بصحى على خوف من إني ألاقي مصيبة جديدة منشورة عني. أنا بس نفسي كل بنت تاخد باله
ياري الساده المحامين يساعدوني