اكسي بيهددني بصوري الخاصة وبعتها لأهلي

                كتب وأنا منهارة ومش عارفة أتصرف إزاي. من حوالي شهرين، انفصلت عن شخص كنت مرتبطة بيه لمدة سنة.
                للأسف، وبسبب الثقة، كان فيه بيننا صور خاصة وشخصية جدًا اتبعتت على واتساب. بعد الانفصال، فضل يطاردني ويحاول يرجعلي، وأنا كنت رافضة تمامًا.

من أسبوع، الموضوع اتحول لجحيم. بدأ يهددني إنه لو مرجعتلوش، هينشر الصور دي و"يفضحني".
أنا مصدقتوش وقلت ده تهديد فارغ. تاني يوم، لقيت أكونت "فيك" على فيسبوك منزل صور ليا، بعضها حقيقي وبعضها متفبرك بشكل مقزز،

ومكتوب عليها كلام يسيء لسمعتي. بعدها فورًا بعتلي على واتساب رسالة بيقول فيها "ده بس قرصة ودن، الجاي أسوأ".

لما عملتله بلوك، الموضوع كبر أكتر. تاني يوم، لقيت رسالة تهديد صريحة وصلت على واتساب والدي، بيقوله فيها "بنتك لو متعلمتش الأدب، صورها هتبقى على كل تليفونات مصر". والدي واجهني وأنا انهرت وحكيتله كل حاجة.

بناءً على نصيحة والدي، روحت فورًا الإدارة العامة لمكافحة جرائم تقنية المعلومات (مباحث الإنترنت)، وقدمت بلاغ رسمي. 
عملت محضر بالواقعة، وقدمت كل الأدلة اللي معايا: سكرين شوت من محادثات التهديد، ورقم تليفونه، ولينكات الأكونتات الفيك، 
والرسالة اللي وصلت لوالدي. الضابط المسؤول طمني وقالي إن دي جريمة ابتزاز وعقوبتها شديدة، وإنهم هيعملوا التحريات الفنية عشان يحددوا هويته ويقبضوا عليه، بس الموضوع ممكن ياخد شوية وقت.

أنا مرعوبة من "شوية الوقت" دول. خايفة على سمعتي وعلى نفسية أهلي، وخايفة إنه ممكن يعمل حاجة أسوأ.
عادي اتخاذ أي إجراء قانوني سريع، كأمر من النيابة مثلاً، لإجبار فيسبوك على حذف هذه المنشورات والصفحات فورًا، بدلاً من انتظار انتهاء التحقيقات