ما هو الموقف القانوني لجريمه فيصل

                مش عارفة أبدأ منين من كتر الصدمة اللي أنا فيها زيي زي كل الناس. أنا قريت تفاصيل الجريمة البشعة اللي حصلت في فيصل دي، 
                بتاعة الراجل صاحب محل الأدوية البيطرية اللي قتل ست وولادها التلاتة. أنا بجد مش قادرة أستوعب التفاصيل ولا قادرة أفهم إزاي فيه بني آدم ممكن يوصل للدرجة دي من القسوة والبرود.

يعني حسب اللي قريته في اعترافاته، هو كان على علاقة بالست دي، وخلاها تسيب بيتها وتيجي تعيش معاه. بغض النظر عن إن ده غلط منها هي كمان،
لكن هل ده يديله الحق إنه يقتلها؟ يقول عشان اكتشف إن سلوكها سيء قرر يخلص منها. يخلص منها إزاي؟ يجيبلها سم من المحل بتاعه ويحطهولها في العصير. ده تخطيط كامل للجريمة.

والأبشع من القتل نفسه، هو اللي عمله بعد كده. إنه ياخدها وهي بتموت ويوديها المستشفى باسم مستعار، كأنه جوزها،
وبعدين يسيبها هناك ويمشي عشان تموت لوحدها. ده معناه إنه كان واعي وفاهم هو بيعمل إيه وبيحاول يخفي جريمته.

لكن الكارثة الحقيقية واللي مش قادرة تروح من بالي هي الأطفال. إزاي بني آدم، أيًا كان، يطاوعه قلبه يقرر يقتل تلات أطفال مالهمش أي ذنب في أي حاجة؟
إزاي ياخدهم بحجة إنه هيفسحهم، وهو في نيته يموتهم؟ ده مستوى من الشر أنا مكنتش أتخيل إنه موجود.

يحط لهم نفس السم في العصير. والطفلين اللي شربوا، والتالت اللي مرضيش يشرب، يروح ياخده ويرميه في ترعة عشان يغرقه؟ يعني قتل بتلات طرق مختلفة.
سم، وغرق، وإهمال. والطفلين التانيين اللي شربوا السم، واحد يموت في السكة، والطفلة التانية كانت لسه بتطلع في الروح، يروح يرميها في الشارع ويجيب سواق توكتوك يساعده في إنه يتخلص منها.

أنا بجد مش بسأل عن قضية تخصني، أنا بسأل كواحدة من المجتمع مرعوبة. إزاي فيه قلب كده؟ إيه كمية البرود دي؟ هل ده شخص طبيعي أصلًا؟ ولا ده مريض نفسي أو مختل عقليًا؟

اللي قلقني إن دايمًا في الجرايم البشعة دي، بنسمع إن محامي المتهم بيحاول يطلعه مريض نفسي أو مجنون عشان يفلت من العقوبة. هل ده ممكن يحصل في قضية زي دي؟
إيه هو الموقف القانوني بالظبط لواحد زي ده؟ وسواق التوكتوك اللي ساعده ده إيه موقفه؟

التوصيف القانوني للجرائم اللي هو ارتكبها دي إيه بالظبط؟ وإيه هي العقوبة المتوقعة ليه؟
هل فيه أي احتمال قانوني إنه يفلت من الإعدام بحجة إنه مريض نفسي أو مختل عقليًا، خصوصًا مع بشاعة الجريمة دي؟
سواق التوكتوك اللي ساعده في رمي الطفلة وهي بتموت، موقفه إيه في القضية؟ هل بيعتبر شريك معاه؟