استشاره بخصوص شراء شقه ولكن وجد فيها عيب خقي

                أنا وخطيبي جمعنا تحويشة عمرنا عشان نشتري شقة نتجوز فيها. من ٦ شهور، اشترينا شقة في عمارة جديدة من صاحبها مباشرة.
                كتبنا "عقد بيع ابتدائي" ودفعنا له ٨٠٪ من تمن الشقة، واتفقنا إن باقي المبلغ هيتدفع عند التسجيل النهائي في الشهر العقاري.

استلمنا الشقة وبدأنا في مرحلة التشطيبات عشان نجهزها للجواز. صرفنا مبلغ كبير على الدهانات والجبسون بورد والأرضيات. من حوالي شهر،
ومع أول شتاء يدخل علينا، بدأت الكارثة. لقينا بقع رطوبة وعفن بتظهر في كل حوائط الشقة وسقف الحمام والمطبخ. الدهان بيقشر والجبسون بورد بدأ يبوظ. الموضوع بيزيد كل يوم لدرجة إن الميه بقت بتنزل على الأرض.

جبنا مهندس على حسابنا، وبعد ما كشف على الشقة والعمارة، قالنا إن فيه "عيب خفي" خطير في أساسات السباكة والعزل المائي للمبنى كله، 
وإن المشكلة دي هتفضل موجودة وهتزيد ومش هتتحل بدهان أو حلول مؤقتة، ولازم يتعملها إصلاحات كبيرة ومكلفة جدًا.

طبعًا كلمنا صاحب العمارة فورًا، في الأول كان بيماطل ويقول "دي حاجة بسيطة وهبعت حد يشوفها". بعت عامل عمل شوية حاجات شكلية والمشكلة رجعت أسوأ من الأول. 
لما كلمناه تاني، بدأ يزعق ويقول إنه سلمنا الشقة سليمة وإنه مش مسؤول عن أي حاجة تظهر بعد الاستلام، وإن دي مشكلتنا إحنا. ومن وقتها وهو مش بيرد على تليفوناتنا خالص.

أنا دلوقتي في مصيبة، شقة دافعة فيها كل فلوسي ومش عارفة أسكن فيها، وتشطيبات كلفتني دم قلبي بتبوظ قدام عيني. 
ولسه باقي علينا دفعة أخيرة من تمن الشقة وخايفة أدفعها وفي نفس الوقت خايفة لو مدفعتهاش العقد يبوظ وأخسر كل حاجة.

مش انا كده من حقي أطلب فسخ العقد وأسترد كل الفلوس اللي دفعتها لو هو فضل متعنت ورفض يصلح العيب