صاحب البيت بيطاردني عشان أسيب شقة إيجار قديم ورثتها عن جدي

                عندي شفه في وسط البلد جدي الله يرحمه هو اللي كان مأجرها في الستينيات، بعقد إيجار قديم مفتوح وإيجارها يعتبر ببلاش دلوقتي.
                بعد جدي ما توفى، العقد اتنقل لأبويا لأنه كان عايش معاه، وبعد ما أبويا اتوفى من خمس سنين، العقد اتنقلي أنا، لأني اتولدت وعشت حياتي كلها في الشقة دي وكنت مقيم معاه بشكل دايم.

طول السنين اللي فاتت، علاقتنا كانت كويسة جدًا مع صحاب العمارة الأصليين. لكن من سنة، الورثة باعوا العمارة كلها لشركة استثمار عقاري كبيرة. 
ومن أول يوم المالك الجديد ده استلم فيه العمارة، وحياتي أنا وباقي السكان اللي لسه إيجار قديم اتقلبت لحرب أعصاب.

الهدف واضح وصريح، المالك الجديد عاوز يطردنا كلنا من العمارة بأي شكل عشان يهدمها أو يوضبها ويبيع الشقق بالملايين.
وهو عارف إن القانون بيمنعه يطردنا بشكل مباشر، فبدأ يستخدم أساليب تانية عشان يطفشنا ويخلينا إحنا اللي نمشي من نفسنا.

أول حاجة، وقف أي نوع من أنواع الصيانة في العمارة. الأسانسير بقى عطلان على طول ويقول مفيش قطع غيار. 
نور السلم والمداخل مطفي. مواسير الصرف الرئيسية في العمارة بتسرب ومباني الحيطان بدأت ترشح ميه، وهو مطنش تمامًا ومبيردش على أي شكاوى، وده بيهدد سلامة العمارة كلها.

تاني حاجة، بدأ يكسر ويهد في الشقق الفاضية وفي السطح والمناور بشكل عنيف جدًا، بحجة إنه بيرمم.
التكسير ده شغال في أوقات غريبة وبيعمل دوشة وصداع وتراب مالوش آخر، ليل نهار. الهدف كله إن حياتنا تبقى جحيم ومنعرفش نقعد في بيوتنا.

تالت حاجة، بدأ يستخدم معانا أسلوب قانوني رخيص. كل شوية يبعتلي إنذار على يد محضر بحجج أي كلام.
مرة يقولي إني غيرت لون بلكونة، ومرة تانية إني بستغل السطح، وكلها اتهامات كذب هدفها إنه يخوفني ويخليني أصرف فلوس على محامين وأزهق.

رابع حاجة، عرض عليا مبلغ تافه كخلو رجل، مبلغ ميجيبش أوضة في أي حتة. ولما رفضت، المضايقات زادت أكتر.

آخر حاجة عرفتها، إنه بيجهز يرفع عليا قضية طرد، بحجة إن إقامتي مع أبويا مكنتش دايمة ومستقرة لما اتوفى، 
وده كذب طبعًا لأني مليش بيت تاني غير ده طول عمري. أنا دلوقتي بحارب لوحدي عشان أحافظ على بيتي وتاريخ عيلتي كله في المكان ده.

إيه هي حدود حقوقي كوريث للشقة دي بقانون الإيجار القديم وهل ممكن فعلًا يطردني بالقانون بحجة عدم استقرار الإقامة دي