ليه القانون مش بيعاقب على الارتباط بين الشباب مادام هو حرام وزنا؟

                ساكنة في التجمع الأول وبكتب عشان عاوزة أسأل عن ظاهرة اجتماعية شايفاها بتنتشر زي الوباء في مجتمعنا،
                وحاسة إن القانون ساكت عليها ومبيعملش حاجة تمنعها. الظاهرة دي هي إن العلاقات الكاملة بين الولاد والبنات بره الجواز بقت حاجة عادية ومقبولة، اللي بيسموها الارتباط أو الصحوبية.

أنا بتكلم من اللي بشوفه كل يوم حواليا. في الجامعة، في النادي، في الكافيهات والمولات اللي في منطقتي، 
بقى العادي إني أشوف شاب وبنت في أوضاع قريبة من بعض وبيحضنوا ويبوسوا بعض كأن ده الطبيعي والمجتمع متقبله.
الموضوع مبقاش بس في الأماكن المقفولة، ده بقى في الشارع وفي العربيات كمان. مبقاش فيه أي كسوف أو خوف من الناس.

والأخطر من ده إن الظاهرة دي وصلت لعيال صغيرة. جنب بيتي فيه كام سنتر دروس ثانوية عامة كبار.
اللي بيحصل قدام السناتر دي وفي أوقات الدروس وبعدها دي حاجة مينفعش نسكت عليها. مجموعات ولاد وبنات، عمرهم يا دوب ١٦ و١٧ سنة، في علاقات مع بعض ومعلنة قدام الكل.

إيديهم في إيدين بعض، وكلام وحركات متليقش بسنهم ولا بمجتمعنا، وبقت هي دي القاعدة.


من ناحية الدين، الموضوع ده حرام قطعًا وبيعتبر من الكبائر وبيخش في دايرة الزنا.
بس المشكلة إن وازع الدين عند ناس كتير مبقاش كفاية عشان يمنعهم. الدين بقى في نظرهم مجرد رأي شخصي، مش قانون يمشوا عليه.

وهنا بقى بييجي سؤالي القانوني. فلما الردع بتاع الدين والأخلاق يفشل، مش المفروض بقى القانون يتدخل عشان يحمي قيم المجتمع؟ أنا دورت في القوانين المصرية واستغربت أوي.
لقيت إن القانون بيعاقب على الزنا، بس للمتجوزين بس، وبشروط صعبة أوي عشان يتثبت. ولقيت مواد عن الفعل الفاضح في الشارع،

والتحريض على الفسق. بس ملقيتش ولا مادة قانون واحدة واضحة بتجرّم أو بتعاقب على مجرد إن اتنين بالغين مش متجوزين يعملوا علاقة مع بعض برضاهم.

القانون بيعاقب على النتيجة اللي الناس بتشوفها (الفعل الفاضح)، لكن مش بيعاقب على أصل المشكلة نفسها، اللي هي العلاقة الحرام دي. 
الفراغ اللي في القانون ده هو اللي بيشجع الشباب يتمادوا، لأنهم عارفين إنهم طول ما متقفشوش في وضع فاضح في مكان عام، فهما في أمان ومحدش هيحاسبهم.

ايه السبب القانوني أو الفلسفة التشريعية التي تجعل المشرع المصري يمتنع عن وضع نص قانوني صريح يجرم العلاقات بين غير المتزوجين