إزاي أثبت حقي في شقة بعقد ابتدائي وصاحبها باعها تاني؟
حوّشت تحويشة العمر وقررت أشتري شقة أستر فيها نفسي وأولادي. بعد لف ودوران، لقيت شقة في منطقة كويسة وصاحبها راجل محترم في الأول، واتفقنا على كل حاجة.
إيه اللي حصل بالظبط؟
من حوالي سنتين، قعدت مع صاحب الشقة، الحاج "سيد"، واتفقنا على سعر الشقة. دفعتله مبلغ كبير كمقدم، حوالي 70% من تمنها، وكتبنا "عقد بيع ابتدائي" بينا وبين بعض، مضيت عليه أنا وهو والشهود كانوا اتنين صحابي اللي وصّلوني ليه أصلاً. اتفقنا في العقد إن باقي المبلغ هيتدفع على قسطين خلال سنة، وإني هستلم الشقة مع آخر قسط عشان أبدأ أوضب فيها، وإننا هنسجل العقد ده في الشهر العقاري بعد ما أخلص كل الفلوس اللي عليا.
أنا، على نياتي، كنت بسدد الأقساط في مواعيدها بالمللي، وآخد منه إيصال بالمبلغ اللي دفعته. خلصت آخر قسط من حوالي 6 شهور،
وروحتله عشان آخد مفتاح الشقة ونتفق على يوم نروح فيه الشهر العقاري عشان نسجل العقد زي ما اتفقنا.
وهنا بقى بدأت المأساة...
كل ما أكلمه يتحجج بحجة شكل. مرة يقولي "أصلي مسافر البلد الأسبوع ده"، ومرة "والدتي تعبانة ومش فاضي"، ومرة
" لما نشوف موضوع الدولار ده هيرسى على إيه". أنا بدأت أقلق، بس كنت بقول يمكن الراجل مشغول بجد.
لحد ما من أسبوع، جاري اللي ساكن في نفس العمارة كلمني وقالي: "يا أستاذ محمد، فيه ناس جديدة بتوضب في الشقة اللي أنت اشتريتها".
جريت على العمارة لقيت صنايعية شغالين في الشقة وبيقولوا إن فيه واحد تاني اشتراها من الحاج "سيد" من شهرين، ومعاه عقد نهائي متسجل في الشهر العقاري كمان!
واجهت الحاج "سيد" بالكلام ده، قالي بكل برود: "أيوة بعتها، الراجل التاني دفعلي كاش والمبلغ اللي كان باقي عليك أنا رجعهولك".
أنا طبعا رفضت وقلتله إزاي تبيع حاجة أنت بايعهالي الأول ومعايا عقد بيها؟ قالي "العقد اللي معاك ده بلّه واشرب ميته، ده عقد ابتدائي، لكن التاني معاه عقد مسجل، والقانون في صف اللي بيسجل الأول".
إزاي أقدر أثبت للقاضي إني اشتريت الأول هل الشهود اللي ماضيين معايا على العقد كفاية والإيصالات اللي معايا بتاعة الأقساط ليها لازمة
.png)