واحد بيبتزني بصور وعايزني أسيب خطيبي وأرجعله

                عارفة إن كلامي ممكن يضايق ناس كتير، ويمكن فيه ناس تهاجمني، بس أنا في كارثة ومحتاجة مشورتكم ومشورة المحامين بالذات.
                ربنا إداني شكل ومظهر حلو. زمان، يمكن من سنتين تلاتة، مكنتش بفكر صح، وكنت بستغل الميزة دي غلط. كنت بحب أحس إني مرغوبة ومهمة، وكنت بعرف إزاي أخلي الشباب يهتموا بيا ويتعلقوا بيا بجسمي وبشكلي، ويمكن كنت باخد منهم هدايا أو بستفيد منهم مادياً، بعترف بده.
                
                
في الفترة دي، كنت مرتبطة بشخص معين، وعلاقتنا كانت قوية أوي، أو ده اللي أنا كنت فاهماه وقتها. ولأني كنت بثق فيه ثقة عمياء، أو يمكن كنت غبية ومش بفكر، بعتله صور وفيديوهات خاصة جداً ليا، حاجات مينفعش أي حد يشوفها غيري. العلاقة دي انتهت من فترة وكل واحد راح لحاله.

المهم، أنا كبرت وعقلت، وحسيت إني كنت ماشية في طريق غلط. ربنا تاب عليا وغيرت حياتي كلها، وقطعت علاقتي بكل الناس القديمة دي. من فترة قريبة اتخطبت لواحد محترم جداً وابن ناس، بحبه وبيحبني ومستعدة أبدأ معاه حياة جديدة ونضيفة.

الكارثة بدأت من أسبوع، الشخص القديم ده عرف إني اتخطبت، ورجع يكلمني على واتساب. في الأول كان كلام عادي، بعدين بدأ يلمح بالصور اللي معاه. ولما صديته، هددني صراحة وبعتلي صورة من صوري عشان يثبت كلامه. قالي بالحرف: "يا إما تفسخي خطوبتك دي وترجعيلي زي الأول وتعمليلي اللي أنا عايزه، يا إما كل صورك وفيديوهاتك دي هتبقى عند خطيبك وأهله، وهعملك بيها ألبوم على الفيسبوك وأشهر بيكي في كل مكان".

أنا بقالي أسبوع بموت من الرعب، مش باكل ولا بنام. خايفة من الفضيحة ومن خراب بيتي قبل ما يبدأ. خطيبي لو عرف حاجة زي دي مستحيل يكمل معايا. أنا تايهة ومش عارفة أعمل إيه

لو قررت آخد خطوة قانونية وأعمل محضر، هل الموضوع ده بيتم في سرية؟ أنا أكبر مخاوفي إن الموضوع يتسرب وأهلي أو خطيبي يعرفوا.
هل أنا نفسي ممكن أتعرض لأي مساءلة قانونية أو أتسأل عن طبيعة الصور دي، ولا القانون بيحميني كضحية ابتزاز
ممكن اقدر اسجنه فعلا لو رحت قدمت بلاغات ضده