نصب مالي عن طريق مكالمة خدمة عملاء البنك

                 كنت بحاول أشتري حاجة أونلاين بكارت الفيزا بتاعي بتاع البنك الأهلي، وكل شوية العملية تترفض. قلت يمكن في مشكلة في الموقع، بس كررتها كذا مرة وبرضه اترفضت. بعدها بحوالي ساعة، لقيت رقم غريب بيكلمني، فتحت الخط، واحد بيرد عليا بمنتهى الأدب والاحترام وقالي: "مساء الخير يا فندم، مع حضرتك (وقال اسم) من قسم الدعم الفني للبنك الأهلي المصري. بنعتذر لحضرتك جدًا، بس إحنا لاحظنا وجود محاولات شراء مرفوضة ومتكررة من على الكارت الخاص بحضرتك، وده فعل عندنا سيستم الحماية بشكل تلقائي ووقف الكارت مؤقتًا. هل حضرتك اللي كنتي بتقومي بالعمليات دي؟"

طبعًا من غير أي شك قلت له آه أنا. ارتحت جدًا وحسيت إن البنك أهو مهتم وشاف المشكلة. قالي بمنتهى الثقة: "تمام يا فندم، متقلقيش خالص، ده إجراء روتيني لحماية حسابك. عشان نرجع نفعل الكارت لحضرتك محتاجين نحدث البيانات مع بعض على السيستم. أنا هكون مع حضرتك خطوة بخطوة."

هنا بدأت المصيبة اللي ما كنتش فاهماها. قالي: "هوصل لحضرتك دلوقتي رسالة فيها كود على رقم الموبايل المسجل عندنا، من فضلك مليني الكود ده لتأكيد هويتك." وبالفعل، في نفس الثانية وصلتني رسالة من البنك الأهلي، نفس الرقم اللي بتجيلي منه كل رسايل البنك، وفيها كود OTP. أنا من سذاجتي، مليتهاله على طول.

بعدها بدأ يسألني أسئلة تبان عادية، تاريخ ميلادك، آخر أربع أرقام من الرقم القومي عشان يتأكد... وأنا بجاوب. وبعدين قالي: "تمام يا فندم، السيستم قبل البيانات. دلوقتي عشان التفعيل النهائي محتاجين من حضرتك الـ 16 رقم اللي مطبوعين على وش الكارت."

هنا أنا للحظة ترددت، قلت له هو مش المفروض البيانات دي سرية؟ رد عليا بكل هدوء وثقة: "يا فندم إحنا عمرنا ما نطلب من حضرتك الرقم السري (الـ CVV) اللي في ظهر الكارت، ده فعلًا سري. إحنا بس محتاجين رقم الكارت نفسه عشان نفعله على السيستم عندنا، وده إجراء طبيعي جدًا وموجود في كل البنوك." كلامه كان مقنع جدًا، وحسسني إني لو رفضت هبقى بتصرف بغباء.

للأسف، اديته الـ 16 رقم. وفي الآخر قالي: "تمام جدًا يا فندم، آخر خطوة هي تاريخ انتهاء الصلاحية المكتوب تحت الرقم." اديتهاله وأنا مغيبة تمامًا.

قالي بمنتهى البرود: "شكرًا جدًا يا فندم، دقيقة واحدة وهتكون الخدمة اتفعلت وهتوصل لحضرتك رسالة تأكيد. يومك سعيد." وقفل السكة.

قعدت مستنية رسالة التفعيل دي مجتش. قلبي بدأ ينغزني. فتحت أبلكيشن البنك عشان أشوف لو الكارت اشتغل... وهنا كانت الصدمة. لقيت كل الفلوس اللي في الحساب، كل قرش حوشته من مرتبي، مسحوبة على 3 عمليات شراء أونلاين من مواقع أنا عمري ما سمعت عنها، وكل ده حصل في الدقايق اللي كنت بكلمه فيها.

اتضح إن رسالة الـ OTP اللي بعتها في الأول دي مكنتش لتأكيد هويتي، دي كانت عشان هو يضيف الكارت بتاعي على محفظة إلكترونية عنده. ولما خد مني باقي البيانات، قدر يشتري بيهم أي حاجة هو عايزها.

أنا جريت على قسم الشرطة عملت محضر، وكلمت البنك وقفت الكارت، بس الكل بيقولي إن الفلوس طالما خرجت في عمليات شراء، صعب جدًا ترجع. أنا مش بس مقهورة على الفلوس، أنا مقهورة بجد 
عاوزه حل